Sunday, December 11, 2011

शांततेचा आवाज..


शांततेचा आवाज..
ऐकलायस कधी?
जाणाऱ्या क्षणांच्या पावलांना
मोजलंयस कधी ?

एक अशी निवांत वेळ..
जेव्हा कुणीच बोलणारं नसतं
आणि शब्दच श्रोते बनून असतात
आपल्याच मनाचं.. आपल्याच मनाशी
व्यक्त केलंयस कधी?

एक मंद खर्जातला सूर..
मिटलेल्या डोळ्यांच्या आकाशात घुमत असतो
हळूहळू क्षितीजाकडून आकाश उसवत जातं
मग अनंत अवकाशात, स्वत:च्या आकाशासह
मुक्त विहार सुरू होतो..
हव्या त्या दुनियेत..
हलकं हलकं होऊन..
शेवटी परत यावं लागतंच..
जबाबदारीच्या दुनियेत..
पण आता बळ आलेलं असतं
वास्तवाचं ओझं पेलायचं!

शांततेचा आवाज..
ऐकलायस कधी?
जाणाऱ्या क्षणांच्या पावलांना
मोजलंयस कधी ?

....रसप....
११ डिसेंबर २०११

No comments:

Post a comment

Please do write your name.
आपलं नाव नक्की लिहा!

Related Posts Plugin for WordPress, Blogger...