Thursday, December 29, 2011

मैत्रिण माझी


सुगंध यावा प्राजक्ताचा अशी बोलते मैत्रिण माझी
रंग उडावे इंद्रधनूचे तशीच रुसते मैत्रिण माझी

माझे सारे माझे असते, तिचे तिचे पण तिचेच नसते
माझ्यासाठी मनास अपुल्या मुरड घालते मैत्रिण माझी

मनात काहुर दाटुन येता, फक्त निराशा समोर असता
हळवी फुंकर घालुन सारे मेघ उडवते मैत्रिण माझी

वाट बदलता पाउल माझे, रस्ता चुकतो मी भरकटतो
पुन्हा एकदा हात धरूनी दिशा दावते मैत्रिण माझी

शिंपल्यातला मोती तैसा तिच्या पापण्यांमधला अश्रू
थेंब सांडण्याआधी माझे काळिज पिळते मैत्रिण माझी

रूक्ष कोरडा असाच मी अन् दुखावते ती अनेक वेळा
पुन्हा पुन्हा मी क्षमा मागतो, पुन्हा मानते मैत्रिण माझी  

तिच्याचसाठी मनामधे मी खास वेगळी जागा केली
आता मजला भेटत नाही, मनात वसते मैत्रिण माझी

ती नसताना आरश्यातल्या प्रतिबिंबाला छेदच जातो
माझ्यापासुन माझ्याकडचा पूल तोडते मैत्रिण माझी


....रसप....
२९ डिसेंबर २०११

3 comments:

  1. छान आहे मैत्रीण!खूप आवडली!

    ReplyDelete
  2. yessss..... ashiekhadi maitrin asavich ayushyat ....
    aayushya far sundar aani pravahi hot.....ek praglbh naat swachh sundar paradarshee......

    ReplyDelete

Please do write your name.
आपलं नाव नक्की लिहा!

Related Posts Plugin for WordPress, Blogger...