Saturday, March 23, 2013

मी किनारा, लाट ती, भिडते कधी

ओढ ना मजला तिची असते कधी
मी किनारा, लाट ती, भिडते कधी

चोरल्यावरही नजर भिडते कधी
गप्प मी, पण ती तरी हसते कधी

अंगणी प्राजक्त नाही मोगरा
तीच श्वासातून दरवळते कधी

तू तिच्या तुलनेत छोटा, ईश्वरा
ती मला प्रत्यक्षही दिसते कधी

प्रेम डोळ्यातून नकळत वाहिले
आजही ना पापणी सुकते कधी

आग विझल्यावर निखारे राहती
ती निघुन जाते तरी उरते कधी

दर्शनाची रांग चालावी हळू
ऊब ममतेची पुन्हा मिळते कधी ?

तो हरेकाच्या विटेवरती उभा
झावळ्यांची झोपडी टिकते कधी ?

खूप रडलो दु:ख ना घटले 'जितू'
हासल्यावर वेदना भुलते कधी


....रसप....
१९ मार्च २०१३

No comments:

Post a comment

Please do write your name.
आपलं नाव नक्की लिहा!

Related Posts Plugin for WordPress, Blogger...