Saturday, April 13, 2013

भावनांचा अंतराशी दाबतो उद्रेक मी


अंतरातच भावनांचा दाबतो उद्रेक मी
विझविण्या ती आग अश्रू सांडतो कित्येक मी

धुंद झाल्यावर ठरवतो 'सोडले आता तिला'
सांजवेळी रोज असतो एक ती अन् एक मी

संपला पेला तरीही कंठ आहे कोरडा
आज अश्रू एकही ना चाखला बहुतेक मी

लोकशाहीतील राजे खूप झाले आजवर
तप्त रक्ताचे अनन्वित पाहिले अभिषेक मी

चेहरा खोटा न माझा वाटतो कोणासही
सभ्यतेच्या नाटकाचा बोलका अतिरेक मी

कोण तू माझा, तुझा मी कोण आहे विठ्ठला ?
मागण्यांच्या पूर्ततेपुरताच आहे नेक मी

....रसप....
११ एप्रिल २०१३

No comments:

Post a comment

Please do write your name.
आपलं नाव नक्की लिहा!

Related Posts Plugin for WordPress, Blogger...