Monday, June 10, 2013

लडाख

पर्वतरांगा
तुझ्याच सार्‍या
तुझी पठारे
तुझ्याच सरिता
वाळवंटही
तूच पसरल्या
शिखरांपासुन
पायथ्यांपुढे
शुभ्र हिमाच्या
अनंत शाली
धरणी भिडते
आकाशाला
असा अनोखा
संगमसुद्धा
तूच घडवला

वैविध्याचे
आश्चर्यांचे
अथांगतेचे
अनंततेचे
असे प्रदर्शन
कधी न दिसले
परंतु येथे
विशालतेच्या
परिसीमेला
मानवतेची
चाहुल नाही
असे भयंकर
रूप तुझे तर
कसे असावे
दानवतेचे
भीषण दर्शन ?

जेव्हा येतो
तुझ्या रूपाने
समोर मृत्यू
तुझ्याच निश्चल
शांतपणाने,
कशी तुझी ही
भीती झटकुन
पुन्हा एकदा
मनात माझ्या
विशुद्ध श्रद्धा
भरून यावी
आणि जुळावे
कर हे दोन्ही
निव्वळ, अस्सल
प्रेमापोटी ?

माझ्यामधल्या
तुझ्याच एका
ह्या अंशाला
सांग तुझ्या ह्या
विशालतेतुन
शोधुन काढुन
तूच स्वत:ला..!

....रसप....
८ जून २०१३

1 comment:

Please do write your name.
आपलं नाव नक्की लिहा!

Related Posts Plugin for WordPress, Blogger...